وليلة كانت الفرقا

هذا كان موضوع قديم لي نزلته بكذا منتدى ولقيته بالصدفه لقيته يصب في مصب المدونه (صراحه تسدحت على نفسي من هالاسلوب القوي)
اسمحولي عاد الاسلوب لك عليه شوي ولا بغيت اعدل فيه
تابعونا وفالكم طيب :)

طيب خل ابتكلم عن المازدا و ذكرياتي عنها
في عام 1984 (مبطي والله بس تسنها البارحه) كنا في حاجه سواق و سياره جديده عشان حنا كثرنا ولا عاد فيه احد
المهم ابوي لقا ذا الحبوبه بالمعارض و سعرها زين ولا مشت ابد و يعني لؤطه
و دارت الايام و مرت السنين و كبرت انا و تعلمت السواقه....زيي زي اي شاب في هذا السن
طبعا انا تعلمت على هالمسيكينه اللي ما تقول لا
و طبعا مراهق يعني لازم افحط
وابشركم اخذت حقي و حق غيري من التفحيط
بس الشي اللي حبيته في السياره هذي انها ما تسد قالت لي لا او ما ابي او شي
ما ادق سلف الا تشتغل و عااااااااااااااااان عن عن
بس انا حسيت انها تغار
شلون و من مين اعلمكم لحين
سلمكم الله انا شريت بعدها سياره يوم كبرت و من عقبها و المازدا تشره علي و تتدلع و انا ما حسيت بشي(والله من الهداره)
يوم تجيني تقول لي مزكمه(الحراره مرتفعه) و يوم رجلي ملتويه ميب عاقله ريفالدو(يعني مبنشره) و يوم و يوم الزبده تعبت
المهم صرت من تالي اخلي موتري بالبيت و اطلع بذا المازدا مع انه مابه مكيف وحررر و بلا بس لعيونه
ذيك الساعه وش صار لي
صار انه موتري انا حمق علي
لا حووووووووووووووووووووووووووووووووووووووووول
بالله يعني وش ازين اروح لذا و لا اخلى ذا والا ..... بالله وش تبون مني اسوي
يوم استخرت قررت اني ابيع المازدا
و بعدين فكرت


- مجنون انت؟؟؟؟؟؟؟؟؟؟؟؟ ما تحس؟؟؟؟؟؟؟؟؟وش بلاك؟؟؟؟؟؟؟؟يعني تبي تخون كل ذا العشره؟
-- يبن الحلال انت تعرف الوضع و تعرف وش اللي حاصل
- بس ولو ما يصير
- وش اللي ما يصير انا دخت
- يعني لازم
- يعني وش قدامي شي ثاني اسويه
- طيب على هواك(انا الهوى هوايا هوااااااااياااااااااااااااا )
و عقبها رحت ادور لها شراي و ابشركم لقيته و عطان سعرن زين و حلو بس الحين وش المشكله
المشكله قلبي و روحي....لا حوووووول يعني المشكله شلون ابعلمها و شلون ابقول لها
و هاك اليوم ماغير ادور بها و اسولف معها يعني اسايسها حتى هي استنكرت
و دار الحوار التالي
- اقول يا الغاليه
- سم
- امون انا والا ما امون
- استح على وجهك هذا سؤال
- ايه اشوى
- ...........
- يا الغاليه انا حبيت اعرض عليتس موضوع
- امر يا الغالي
- ما يامر عليتس عدو
- ...............
- اقول انا عجزت ابي طريقه ثانيه اقولها لك لكن........انا ابعرضك للبيع
- ايييييييييييييييييييييييييييييييييششششششش
- يا بنت الحلال ترى ما فيها شي واجد مواتر تنباع و ما تدرين يمكن تلقين واحد يهتم بك ويقدرك مثلي و حتى اكثر مني
- (خنقتها العبره و ماي الرديتر مغير يطشر) هذي اخر العشره يا خاااااااااين....تبيعني....انا قد قصرت معك بشي....انا قد قلت لك لا...(الحين صاحت و صياح يعور القلب و يدمي البواجي)
- ................................................(و قتها كنت احك راسي و انا موطيه شوي يعني كنه واحد يبي يختار الفاظه)عيوني
- (و هي تصيح و شمعاتها حمرا و حاتها حاله و تشاهق) ســ......ممم
- والله انا ما ابي لك الا كل خير و ابيك تكونين معززه مكرمه و كبوتك فوق و انا قلت ابيعك لواحد اعرفه يعني راح اشوفك و بعيدن هو قال لي ابحطها بعيوني
- (مسحت دموعها بس لين الحين تشاهق) اللي تشوفه يا بعد عمري
يوم قالتها و انا تسن اللي جاني و صفقني مع جبهتي ....حسيت بشي غريب... مدري وشو
بس يا رجال كله لمصلحه الغاليه ..........دوس على قلبك شوي
و ليله كانت الفرقا و قالت لي ........بيب بييييييييييييييييييييييب
راحت الغاليه
فرطت فيها و هي اللي حضنتي و انا بزر و علمتني لين صرت اعرف اسوق و ما عمرها شكت من زود تفحيط ولا قالت وراك مغير تطاير بي ولا قالت لي ابي تظليله زي فلانه ولا ابي بواجي ذهب ولا راس مكينه فضه زي فلنتانه و علانه
لكن
الله يوفقها و يستر عليها و احب اقول لكم ان بنت الحلال لقت لها من يحطها بعيونه
تستاهل.............وانا كم مازدا عندي

حبايبي عذرا على الاطاله لكن خبركم الواحد الا منه بدا بالذكريات مهوب موقف ابد و اسمحو لنا بعد مره

متخلف

ذيك السنه كان عندنا مخيم انا و الشله ..وقتها كان عددنا يمكن 13 الى 15 شخص المهم كان عندنا مخيم هالكلام عام 98 او 97
وزي اي يوم عادي لا خلصت الجلسه رحت للبيت
رحت للبيت و نمت و يوم قمت ثاني يوم ولا بوكي مهوب معاي ...وش السالفه و ادور ببثايبي المعلقات ما فيه بالسياره مافيه واقلب البيت مافيه
وانشد اخوي ما شافه وارجع للمخيم ما فيه شي ...طيب وش السواة هالحين ..لا معي لا احوال ولا رخصه لابطاقه صراف ولاشي ابد و عاد وقتها كان فيه حمله مسويتها الجوازات حقت المتخلفين واشوفهم يدورون حولنا اكثر من مره فيعني لو يجون و حنا قاعدين وانا ماعندي شي ابصير بنقالي لابس ثوب ..ونشدت برضه اخوياي وماقصرو جزاهم الله خير اطلقو علي لقب المتخلف ...بعد يومين من المعاناة و بعدمالفيت الدواير الحكوميه اسئل عن بدل الفاقد اللي طلع مهمه مستحيله وقفت سيارتي جمب المخيم و القى شي اسود نصه مدفون بالرمل و اناظر ...طلع بوكي المصون اثره طايح مني وانا ابدل ثوبي و البس ثوب المخيم ولاقيه واحد و خذا القروش اللي فيه و رماه بمكان قريب ما علي من القروش اهم شي رجع بوكي المصون و كل بطاقاتي صارت موجوده و رجعت سعودي ابشركم

مرحبا

طبعا بإذن الله ابي ابدا لي مدونه على قد الحال هدفها توثيق بعض السواليف اللي صارت لي من ايام الثانويه و الجامعه عشان بس لا انساها لاني بيني و بينكم صراحه بادي افهي و افوت ولا ودي تتطور الحاله هذي
اتمنى تجوزلكم على رضاكم و السلام عليكم