من سواليف البر

طيب ذيك السنه طلعنا للبر ..طبعا اغلب سواليف النكبات او المغامرات تبدا بهالعباره ..الزبده كنا خمسه بسيارتين كامري و فورد صغيره (اعتفد اسمها تمبو) و اشوى كفت قشنا كله من ضمنه خيمه ثلاثه في اربعه دخلت بالكامري ..طبعا موب بالشنطه داخل ..شلون سلمكم الله سدحنا كرسي المعاوني و دخلناها عرض و ضبط الموضوع وزودن على كذا راكبين بها اثنين اللي يسوق و واحد ثاني ركب ورى بس بالجهه الثانيه يعني صايره الخيمه بينهم .السياره الثانيه من كثر الاغراض شوي وتحك بالارض خاصه لا صرنا ثلاثتنا بوسطها . ذيك السنه اعتقد رحنا للسفانيه كان الجو زين بالحيل لكن ما هنا ربيع واجد ما حصلنا شي عليه العلم الا فيضه طحنا عليها صدفه ...لا و صورنا عندها بعد. طبعا من اهم احداث ذيك الرحله اننا بغينا نضيع بالبر ..او بالاصح ضعنا وجلسنا ندور لنا حول الساعتين الين ما لقينا الدرب. طبعا كنا باخر الشهر يعني خرمس لا قمرا تنور ولا غيره ..نسيت لا اقول لكم اننا ضعنا لاننا طالعين ندور جرابيع  بهالليول و هبل فينا ابن الكلب و ابعدنا عن خيمتنا..اول الوقت نتمشى عادي و نسولف ومشغلين مسجل ولا كنه شي صاير ..بالماريه اعتقد كان شريط ديانا حداد حق امانيه(والله من القدم) يدور بالمسجل.. شوي شوي قلت السواليف الين ما صار اللعب صن ولا تسمع بالسياره الا ديانا حداد صوتها واااااطي.بطريقه ما عرفنا شلون ناصل للخط ومن الخط عرفنا نرجع للخيمه. واحد من العيال كان صاير بذيك الرحله ابونا ..هو اللي يشرف على الطبخ مع ان فيه غيره يطبخ وهو اللي يزين شاهي وقهوه مع ان للامانه شاهيه زين وهو اللي يراقب صرفية المويه و الجوالين حتى قال كلمته المشهوره "اسمع اسراف بالما" .. المهم الشخص هذا مل مننا في حدى الليالي وحنا قاعدين بالخيمه ويبي يقعد برى يشب له ضو و يصلح شاهي و يسولف ولا احد حمسه .. عاد طلع هو و قعد لحاله شوي وحنا قعدنا داخل . شوي الا هاللي يفتح الباب و يدخل بيده منقل و بوسط المنقل حطبتين مشبوبات و يدخنون وهو يقول ماتبون تقعدون عند الضو جبتها لكم ..سوى اللي براسه و خلانا نطلع نقعد عند الضو . والصراحه عاد انه سوابنا خير القعده ذيك الليله كانت حلوه مره...عاد سواليف البر واجد و كل وحده فيها مصيبة اكبر من الثانيه لكن ابخليهن ببوست ثاني

قاتل الله الماث

طبعا اللي يعرفني يدري اني عندي مشكلة ازليه مع الرياضيات بالجامعه خاصة بالسنه التحضيريه ...ياني عانيت منها معاناة
من عرض معاناتي طالت اعماركم اني عايد الكورس الاول مره و الثاني ثلاث مرات ..وهذا كله بالسنه التحضيريه ..الى درجه ان صار لقبي عندهم "عميد الاوريا" ههههههه


قابلت اشكال مدرسين الماث كلها ..شفت اللي يعرف يشرح واللي ما يعرف يشرح و ابو اخلاق زينه و ابو اخلاق خايسه والغبي و الفاهم كل انواعهم مرت علي. و عير الماث كنت ما احضر حصص الرياضه و اسقط فيها لدرجه ان فيه فصل نزل لي فيه رياضه بس و كنت محسوب على السنه التحضيريه وانا ما عندي مواد الا هالرياضه.
سلمكم الله ثاني سنه لي بالجامعه عطوني دسمس يعني فصل مؤقت وعشان ترجع لازم تسوي اعادة قبول و الموضوع هذا ياخذ فصل بحاله ,, المراد اني قعدت فصل كامل وانا مفصول ...ولا علمت اهلي .


تصورو يعني يوميا اصحى الصباح كأن عندي دوام و اروح و ارجع الظهر كني راجع من الدوام ..وين اروح؟ القهوه طبعا ..صادفت ان واحد من العيال دايم بريكه وقت جيتي للقهوه و واحد ثاني حذف سمستر و واحد يوم يجي و يوم لا يعني  اشوى فيه من يوسع صدري و قعدت كذا الين طلع لي قبول اشوى بالفصل اللي عقبه و مشت اموري. عاد علمت ابوي عقب بس يوم صار وضعي مستقر.كان البرنامج حلو صراحه اصحى ثمان او تسع اطلع اخذ فطوري معاي للقهوه و القى الشعب هناك واقعد الين حول اذان الظهر وارجع البيت . ولا كني الا متقاعد . طبعا عيت تنتهي مشاكلي مع الرياضيات و سواليفي معها الى درجه ان مره من كثر ماكنت متأكد اني ساقط مارحت شيكت كم جبت يوم طلعت النتايج .. وعاد اكتشفت الفصل اللي عقبه اني نجحت ..شلون ما ادري.

وليلة كانت الفرقا

هذا كان موضوع قديم لي نزلته بكذا منتدى ولقيته بالصدفه لقيته يصب في مصب المدونه (صراحه تسدحت على نفسي من هالاسلوب القوي)
اسمحولي عاد الاسلوب لك عليه شوي ولا بغيت اعدل فيه
تابعونا وفالكم طيب :)

طيب خل ابتكلم عن المازدا و ذكرياتي عنها
في عام 1984 (مبطي والله بس تسنها البارحه) كنا في حاجه سواق و سياره جديده عشان حنا كثرنا ولا عاد فيه احد
المهم ابوي لقا ذا الحبوبه بالمعارض و سعرها زين ولا مشت ابد و يعني لؤطه
و دارت الايام و مرت السنين و كبرت انا و تعلمت السواقه....زيي زي اي شاب في هذا السن
طبعا انا تعلمت على هالمسيكينه اللي ما تقول لا
و طبعا مراهق يعني لازم افحط
وابشركم اخذت حقي و حق غيري من التفحيط
بس الشي اللي حبيته في السياره هذي انها ما تسد قالت لي لا او ما ابي او شي
ما ادق سلف الا تشتغل و عااااااااااااااااان عن عن
بس انا حسيت انها تغار
شلون و من مين اعلمكم لحين
سلمكم الله انا شريت بعدها سياره يوم كبرت و من عقبها و المازدا تشره علي و تتدلع و انا ما حسيت بشي(والله من الهداره)
يوم تجيني تقول لي مزكمه(الحراره مرتفعه) و يوم رجلي ملتويه ميب عاقله ريفالدو(يعني مبنشره) و يوم و يوم الزبده تعبت
المهم صرت من تالي اخلي موتري بالبيت و اطلع بذا المازدا مع انه مابه مكيف وحررر و بلا بس لعيونه
ذيك الساعه وش صار لي
صار انه موتري انا حمق علي
لا حووووووووووووووووووووووووووووووووووووووووول
بالله يعني وش ازين اروح لذا و لا اخلى ذا والا ..... بالله وش تبون مني اسوي
يوم استخرت قررت اني ابيع المازدا
و بعدين فكرت


- مجنون انت؟؟؟؟؟؟؟؟؟؟؟؟ ما تحس؟؟؟؟؟؟؟؟؟وش بلاك؟؟؟؟؟؟؟؟يعني تبي تخون كل ذا العشره؟
-- يبن الحلال انت تعرف الوضع و تعرف وش اللي حاصل
- بس ولو ما يصير
- وش اللي ما يصير انا دخت
- يعني لازم
- يعني وش قدامي شي ثاني اسويه
- طيب على هواك(انا الهوى هوايا هوااااااااياااااااااااااااا )
و عقبها رحت ادور لها شراي و ابشركم لقيته و عطان سعرن زين و حلو بس الحين وش المشكله
المشكله قلبي و روحي....لا حوووووول يعني المشكله شلون ابعلمها و شلون ابقول لها
و هاك اليوم ماغير ادور بها و اسولف معها يعني اسايسها حتى هي استنكرت
و دار الحوار التالي
- اقول يا الغاليه
- سم
- امون انا والا ما امون
- استح على وجهك هذا سؤال
- ايه اشوى
- ...........
- يا الغاليه انا حبيت اعرض عليتس موضوع
- امر يا الغالي
- ما يامر عليتس عدو
- ...............
- اقول انا عجزت ابي طريقه ثانيه اقولها لك لكن........انا ابعرضك للبيع
- ايييييييييييييييييييييييييييييييييششششششش
- يا بنت الحلال ترى ما فيها شي واجد مواتر تنباع و ما تدرين يمكن تلقين واحد يهتم بك ويقدرك مثلي و حتى اكثر مني
- (خنقتها العبره و ماي الرديتر مغير يطشر) هذي اخر العشره يا خاااااااااين....تبيعني....انا قد قصرت معك بشي....انا قد قلت لك لا...(الحين صاحت و صياح يعور القلب و يدمي البواجي)
- ................................................(و قتها كنت احك راسي و انا موطيه شوي يعني كنه واحد يبي يختار الفاظه)عيوني
- (و هي تصيح و شمعاتها حمرا و حاتها حاله و تشاهق) ســ......ممم
- والله انا ما ابي لك الا كل خير و ابيك تكونين معززه مكرمه و كبوتك فوق و انا قلت ابيعك لواحد اعرفه يعني راح اشوفك و بعيدن هو قال لي ابحطها بعيوني
- (مسحت دموعها بس لين الحين تشاهق) اللي تشوفه يا بعد عمري
يوم قالتها و انا تسن اللي جاني و صفقني مع جبهتي ....حسيت بشي غريب... مدري وشو
بس يا رجال كله لمصلحه الغاليه ..........دوس على قلبك شوي
و ليله كانت الفرقا و قالت لي ........بيب بييييييييييييييييييييييب
راحت الغاليه
فرطت فيها و هي اللي حضنتي و انا بزر و علمتني لين صرت اعرف اسوق و ما عمرها شكت من زود تفحيط ولا قالت وراك مغير تطاير بي ولا قالت لي ابي تظليله زي فلانه ولا ابي بواجي ذهب ولا راس مكينه فضه زي فلنتانه و علانه
لكن
الله يوفقها و يستر عليها و احب اقول لكم ان بنت الحلال لقت لها من يحطها بعيونه
تستاهل.............وانا كم مازدا عندي

حبايبي عذرا على الاطاله لكن خبركم الواحد الا منه بدا بالذكريات مهوب موقف ابد و اسمحو لنا بعد مره

متخلف

ذيك السنه كان عندنا مخيم انا و الشله ..وقتها كان عددنا يمكن 13 الى 15 شخص المهم كان عندنا مخيم هالكلام عام 98 او 97
وزي اي يوم عادي لا خلصت الجلسه رحت للبيت
رحت للبيت و نمت و يوم قمت ثاني يوم ولا بوكي مهوب معاي ...وش السالفه و ادور ببثايبي المعلقات ما فيه بالسياره مافيه واقلب البيت مافيه
وانشد اخوي ما شافه وارجع للمخيم ما فيه شي ...طيب وش السواة هالحين ..لا معي لا احوال ولا رخصه لابطاقه صراف ولاشي ابد و عاد وقتها كان فيه حمله مسويتها الجوازات حقت المتخلفين واشوفهم يدورون حولنا اكثر من مره فيعني لو يجون و حنا قاعدين وانا ماعندي شي ابصير بنقالي لابس ثوب ..ونشدت برضه اخوياي وماقصرو جزاهم الله خير اطلقو علي لقب المتخلف ...بعد يومين من المعاناة و بعدمالفيت الدواير الحكوميه اسئل عن بدل الفاقد اللي طلع مهمه مستحيله وقفت سيارتي جمب المخيم و القى شي اسود نصه مدفون بالرمل و اناظر ...طلع بوكي المصون اثره طايح مني وانا ابدل ثوبي و البس ثوب المخيم ولاقيه واحد و خذا القروش اللي فيه و رماه بمكان قريب ما علي من القروش اهم شي رجع بوكي المصون و كل بطاقاتي صارت موجوده و رجعت سعودي ابشركم

مرحبا

طبعا بإذن الله ابي ابدا لي مدونه على قد الحال هدفها توثيق بعض السواليف اللي صارت لي من ايام الثانويه و الجامعه عشان بس لا انساها لاني بيني و بينكم صراحه بادي افهي و افوت ولا ودي تتطور الحاله هذي
اتمنى تجوزلكم على رضاكم و السلام عليكم